जाफराबाद | प्रतिनिधी | मराठवाडा टाइम्स
जालना जिल्ह्यातील जाफराबाद तालुक्यातील डावरगाव देवी फाटा ते डावरगाव देवी या महत्त्वाच्या रस्त्याची अत्यंत दयनीय अवस्था झाल्याने नागरिकांमध्ये तीव्र नाराजी व्यक्त होत आहे. पावसामुळे रस्त्यावर ठिकठिकाणी मोठमोठे खड्डे पडले असून, अनेक ठिकाणी पाणी साचल्याने वाहनचालक आणि पादचाऱ्यांना मोठ्या अडचणींचा सामना करावा लागत आहे.
या रस्त्याच्या दुरवस्थेविरोधात भूजलतज्ज्ञ तथा प्रसिद्ध रील स्टार प्रताप नवले यांनी सोशल मीडियाच्या माध्यमातून आवाज उठवला आहे. सुमारे 1 लाख 34 हजार फॉलोअर्स असलेल्या प्रताप नवले यांनी रस्त्याची सद्यस्थिती दाखवणारा व्हिडिओ प्रसिद्ध करत संबंधित कंत्राटदार आणि सार्वजनिक बांधकाम विभागाने तातडीने रस्त्याची दुरुस्ती करावी, अशी मागणी केली आहे.
व्हिडिओमध्ये रस्त्यावर पडलेले मोठे खड्डे, पावसाचे साचलेले पाणी आणि वाहतुकीस होणारा त्रास स्पष्टपणे दिसून येत आहे. हा रस्ता परिसरातील शेतकरी, विद्यार्थी, महिला तसेच नागरिकांच्या दैनंदिन प्रवासासाठी महत्त्वाचा असल्याने त्याची दुरुस्ती तातडीने होणे आवश्यक असल्याची भावना नागरिकांनी व्यक्त केली आहे.
रस्त्याच्या कामासंदर्भातील माहिती दर्शविणारा फलकही परिसरात असून, सध्याच्या परिस्थितीमुळे कामाच्या गुणवत्तेबाबतही नागरिकांकडून प्रश्न उपस्थित केले जात आहेत. पावसाळ्यात खड्ड्यांमध्ये पाणी साचल्याने अपघाताचा धोका वाढला असून, विशेषतः दुचाकीस्वारांना मोठा त्रास सहन करावा लागत आहे.
प्रताप नवले यांनी आपल्या सोशल मीडिया पोस्टमधून संबंधित यंत्रणांनी या समस्येकडे गांभीर्याने लक्ष देऊन रस्त्याची तातडीने दुरुस्ती करावी, अशी मागणी केली आहे. त्यांच्या व्हिडिओला मोठ्या प्रमाणावर प्रतिसाद मिळत असून, अनेक नागरिकांनीही या मागणीला पाठिंबा दिला आहे.
दरम्यान, या प्रकरणी संबंधित विभाग किंवा कंत्राटदाराची अधिकृत प्रतिक्रिया अद्याप समोर आलेली नाही. मात्र, सोशल मीडियावर हा मुद्दा चर्चेचा विषय ठरत असून, डावरगाव देवी फाटा–डावरगाव देवी रस्त्याच्या तातडीच्या दुरुस्तीची मागणी अधिक तीव्र होत आहे.
Image Pratap Nawle ( Instagram @pratapnawleofficial)