जाफराबाद तालुक्यातील १,५१८ रेशन लाभार्थी यादीतून वगळले; पात्रतेच्या पडताळणीनंतर कारवाई

जाफराबाद | प्रतिनिधी | मराठवाडा टाइम्स

जाफराबाद तालुक्यात सार्वजनिक वितरण प्रणाली (रेशन) अंतर्गत लाभ घेणाऱ्या लाभार्थ्यांच्या पात्रतेची पडताळणी करण्यात आल्यानंतर १ हजार ५१८ लाभार्थ्यांची नावे रेशन यादीतून वगळण्यात आली आहेत. शासनाच्या निर्देशानुसार अपात्र लाभार्थ्यांवर ही कारवाई करण्यात आल्याची माहिती प्रशासनाकडून देण्यात आली आहे.

मिळालेल्या माहितीनुसार, तालुक्यातील सुमारे ८ हजार ६० रेशन कार्डधारकांपैकी आयकर भरणारे १,०६० लाभार्थी, प्रोड्युसर कंपनीशी संबंधित ४५१ लाभार्थी तसेच शासनाने निश्चित केलेल्या उत्पन्नाच्या निकषांपेक्षा अधिक उत्पन्न असलेले ७ लाभार्थी आढळून आले. विविध शासकीय नोंदींची पडताळणी करून एकूण १ हजार ५१८ लाभार्थ्यांची नावे रेशन यादीतून कमी करण्यात आली.

शासनाच्या नियमानुसार सार्वजनिक वितरण व्यवस्थेचा लाभ केवळ पात्र आणि गरजू कुटुंबांनाच मिळावा, या उद्देशाने ही विशेष मोहीम राबविण्यात आली. यासाठी आयकर भरणारे, उत्पन्नाचे निकष ओलांडणारे तसेच विशिष्ट संस्था किंवा कंपन्यांशी संबंधित लाभार्थ्यांची माहिती विविध शासकीय अभिलेखांच्या आधारे तपासण्यात आली. या पडताळणीनंतर अपात्र लाभार्थ्यांवर कारवाई करण्यात आल्याचे सांगण्यात आले.

दरम्यान, अपात्र लाभार्थ्यांची नावे वगळल्यामुळे पात्र नागरिकांना रेशन धान्याचा लाभ अधिक प्रभावीपणे मिळण्यास मदत होईल, अशी अपेक्षा प्रशासनाने व्यक्त केली आहे. तसेच ज्यांची नावे वगळण्यात आली आहेत त्यांनी आवश्यक कागदपत्रांसह संबंधित कार्यालयाशी संपर्क साधून पात्रतेबाबत माहिती घ्यावी, असेही आवाहन करण्यात आले आहे.

याबाबत जाफराबाद येथील पुरवठा निरीक्षण अधिकारी मीना चव्हाण यांनी सांगितले की, शासनाच्या नियमांनुसार पात्रता पडताळणीची प्रक्रिया राबविण्यात आली असून उपलब्ध शासकीय नोंदींच्या आधारे ही कारवाई करण्यात आली आहे. रेशन कार्डधारकांनी आपल्या उत्पन्नाची माहिती आणि संबंधित नोंदी अद्ययावत ठेवाव्यात, असेही त्यांनी स्पष्ट केले.

(संदर्भ : दैनिक कार्यसत्ताकारमध्ये प्रकाशित वृत्ताच्या आधारे.)

मराठवाडा टाइम्स l Marathwada Times