बाडमेर (राजस्थान) | मराठवाडा टाइम्स
राजस्थानमधील बाडमेर येथे एका खासगी रुग्णालयातील ६५ वर्षीय डॉक्टरला ब्लॅकमेल करून सुमारे २ कोटी रुपये उकळल्याचा आरोप एका नर्सवर करण्यात आला आहे. डॉक्टरांच्या तक्रारीनंतर पोलिसांनी संबंधित नर्सला अटक केली असून प्रकरणाचा सर्व बाजूंनी तपास सुरू आहे. या घटनेमुळे राज्यात मोठी खळबळ उडाली आहे.
नेमके काय आहे प्रकरण?
पोलिसांनी दिलेल्या माहितीनुसार, संबंधित नर्स २०१६ पासून खासगी रुग्णालयात कार्यरत होती. तिचा मासिक पगार सुमारे १२ हजार रुपये होता. रात्रपाळीदरम्यान कामाच्या निमित्ताने किंवा डॉक्टरांना चहा देण्याच्या बहाण्याने ती त्यांच्या खासगी खोलीत जात असल्याचा दावा तक्रारीत करण्यात आला आहे. याच काळात तिने डॉक्टरांचे काही वैयक्तिक आणि खासगी फोटो गुपचूप काढल्याचा आरोप डॉक्टरांनी आपल्या तक्रारीत केला आहे.
बलात्काराच्या गुन्ह्यात अडकवण्याची धमकी?
डॉक्टरांच्या तक्रारीनुसार, संबंधित नर्सने हे फोटो सोशल मीडियावर व्हायरल करण्याची तसेच बलात्काराच्या खोट्या गुन्ह्यात अडकवण्याची धमकी देत त्यांना ब्लॅकमेल केले. समाजातील बदनामी आणि कायदेशीर कारवाईच्या भीतीने आपण वेळोवेळी पैसे देत राहिल्याचा दावा डॉक्टरांनी केला आहे.
२ कोटींची उकळप; कोरे चेक आणि स्टॅम्प पेपरवर स्वाक्षऱ्यांचाही आरोप
डॉक्टरांनी पोलिसांकडे दिलेल्या माहितीनुसार, गेल्या काही वर्षांत त्यांनी संबंधित नर्सला टप्प्याटप्प्याने सुमारे २ कोटी रुपये दिले. यामध्ये जवळपास ३५ लाख रुपये ऑनलाइन व्यवहारांद्वारे, तर उर्वरित रक्कम रोख स्वरूपात दिल्याचा दावा करण्यात आला आहे. याशिवाय, काही कोरे चेक आणि स्टॅम्प पेपरवर जबरदस्तीने स्वाक्षऱ्या घेतल्याचाही गंभीर आरोप डॉक्टरांनी केला आहे.
नर्स अटकेत; आरोप फेटाळले
डॉक्टरांच्या तक्रारीनंतर पोलिसांनी कारवाई करत संबंधित नर्सला अटक केली असून तिच्याकडून काही रोख रक्कम जप्त करण्यात आल्याची माहिती समोर आली आहे. दुसरीकडे, अटकेत असलेल्या नर्सने आपल्यावरील सर्व आरोप फेटाळून लावत ते खोटे असल्याचा दावा केला आहे. तसेच तिने डॉक्टरांविरोधातही गंभीर प्रत्यारोप केले आहेत.
सर्व बाजूंनी तपास सुरू
सध्या बाडमेर पोलीस बँक व्यवहार, सीसीटीव्ही फुटेज, मोबाईल डेटा तसेच इतर डिजिटल आणि भौतिक पुराव्यांची तपासणी करत आहेत. या कथित ब्लॅकमेलिंग प्रकरणात आणखी कोणाचा सहभाग आहे का, याचाही शोध घेतला जात आहे. तपासानंतरच संपूर्ण सत्य समोर येणार असल्याचे पोलिसांनी सांगितले आहे.
टीप : या वृत्तातील आरोप हे पोलिसांकडे दाखल झालेल्या तक्रारीवर आधारित आहेत. प्रकरणाचा तपास सुरू असून न्यायालयाचा अंतिम निर्णय अद्याप झालेला नाही.
